[b]المحافظه على الشعر وحمايتة .[/b]

1- الغذاء
الغذاء الصحي المفيد الطبيعي يعني إنك تحرصي في تناولك للغذاء إنه يكون:
- بيحتوي على جميع العناصر الغذائية المفيدة زي فيتامين "أ" اللي ممكن إنك تحصلي عليه من اللبن والجزر والكبدة.
- وفيتامين‏ (‏هـ‏)‏ متوافر في الخضراوات والبندق واللوز والقمح.
- وكذلك فيتامين‏ (‏ب‏)‏ المركب وتتوافر أنواعه في العديد من الأطعمة.
- ولا مانع من تناول مجموعة فيتامينات إذا كان الغذاء لا يمد الجسم بالعناصر الغذائية المفيدة وده لأن زي ما قلنا وبنأكد دائما إن الشعرة بتتغذى من الغذاء اللي بيحصل عليه الجسم.

2- غسيل الشعر

- حاولي إنك ماتغسليش شعرك على الفاضي والمليان علشان مايفقدش الشعر الحيوية والعناصر الطبيعية الموجودة فيه، يعني يكفي غسل الشعر مرتين أسبوعيا.
- احرصي على استخدام شامبو الشعر المناسب لنوع شعرك.. كمان بعد الشامبو استخدمي مرطب الشعر "البلسم" وده لإنه بيعطي للشعر الحيوية واللمعان وبيحميه من عوامل الجو الضارة.
- فيه حاجة حلوة كمان ممكن إنك تعمليها وهي إنك تغسلي شعرك بالمياه الباردة بعد المرطب لأن ده بيغلف فروة الرأس ويحافظ على رطوبتها، وكمان بيجعل خصلات الشعر بتلمع وناعمة.

3- تسريح الشعر
ازاي تسرحي شعرك بطريقة صحيحة؟
- خلّي بالك من إن المشط المصنوع من الخشب واللي له أسنان عريضة أنسب من المشط المصنوع من البلاستيك اللي بيعمل شحنات كهربائية أثناء التسريح بتؤدي إلى تقصف شعرك.
- وخلي بالك إنك ما تسرحيش شعرك وهو مبلول وده علشان الشعر المبلول بيكون شديد الحساسية وغير قادر على المقاومة، وبالتالي يسهل تقصيفه، علشان كده حاولي إنك تسيبي شعرك لغاية ما يقرب ينشف وبعد كده سرحيه وابدئي التسريح من أطراف الشعر إلى المنبت وهتشوفي الفرق.
- حاجة أخيرة وهي إنك تحرصي إنك تسرحي شعرك صباحا ومساء لأن العملية دي مفيدة في إنها بتخلصك من الأتربة والأوساخ اللي ممكن تكون عالقة بشعرك وبتنشط الدورة الدموية في فروة الرأس.


4-استخدام السشوار.
طبعا مفيش حد ممكن إنه يستغنى عن السشوار بس خلّي بالك من حاجة مهمة قوي وهي إنك ما تستخدميش السشوار إلا بعد ما تتأكدي من إن شعرك قد تخلص تماما من المياه.
وماتخليش درجة حرارة المجفف عالية ولكن خليها متوسطة.

5- الصبغة
طبعا ممكن إنك تفكري إنك تصبغي شعرك على سبيل التغيير، مافيش مشكلة بس خلّي بالك من نوع الصبغة اللي بتستخدميها يعني حاولي على قد ما تقدري إنها تكون بتحتوي على مواد طبيعية.
كمان خليكِ دائما فاكرة إن الشعر المصبوغ بيحتاج إلى عناية من نوع خاص زي مثلا استخدام نوع معين من الشامبو والبلسم اللي مخصص للشعر المصبوغ، لأنه بيساعد على ترطيب الشعر وبيحافظ على الصبغة لمدة أطول.
وحاولي على قد ما تقدري إنك ما تتعرضيش لأشعة الشمس لفترات طويلة علشان ماتتفاعلش الصبغة مع أشعة الشمس وتخلي شعرك لونه باهت.

6- قص أطراف الشعر
عادة ما تكون نهاية الشعر مقصفة وبتعطي مظهر مش حلو، علشان كده حاولي بانتظام إنك تقصي الأطراف المقصفة دي، بس خلي بالك إن المقص يكون حاد ويكون مخصص لقص الشعر، يعني مش المقص المستخدم في المطبخ.
7- تدليك الشعر:
فيه حاجة كمان ممكن تعمليها، وهي إنك تدلكي فروة رأسك باستمرار علشان العملية دي بتساعد على تنشيط جلد الرأس وبتمنع تشابك الشعر مع بعضه.
دي كانت كم حاجة كده حاولي إنك تعمليها وأكيد هتجيب نتيجة كويسة قوي.


ياترى ليه كل ما تسرحي شعرك بيقع منه كتير قوي؟؟



في الحقيقة ده بيحصل لأسباب كتير قوي، وعلى فكرة الأسباب دي بتختلف من شخص للتاني.

ومن ضمن الأسباب دي:
1. تسريح الشعر بشكل خاطئ بيكون سبب أساسي في سقوط الشعر، لأنك وإنت بتسرحي شعرك بتشديه بعنف، وده اللي بيخليه يقع من جذوره.


2. كمان خلي بالك من حاجة مهمة قوي وهي إن فيه تسريحات شعر مؤذية جداً زي "ديل الحصان" أو لف الشعر جامد على "الرولو"، وده لأن طبعاً من كتر شد الشعر.. الشعر بيقع.


3. الاستخدام الكتير لصبغات الشعر وخصوصاً الأنواع الرخيصة اللي بتزيد فيها نسبة الكيماويات اللي بتؤدي إلى جفاف الشعر وتساقطه.


4. الاستخدام الزايد عن اللزوم للسشوار واللي برضه بيؤدي إلى جفاف الشعر وتقصفه وبالتالي سقوطه.



5. استخدام مشط الشعر المصنوع من مادة البلاستيك لأن الأنواع دي بتقصف الشعر مما يساعد على سقوطها.




6. سوء التغذية، كتير بيعتقدوا إن الشعر بيتغذى من خلال الكريمات أو الزيوت اللي بتوضع عليه، لكن في الحقيقة إن الشعر بيتغذى من خلال حصولك على الغذاء السليم اللي بيحتوي على كل العناصر الغذائية اللي هاقول لك عليها بعد شوية، كمان خلي بالك من إن اتباع ريجيم غذائي قاسي بيحرم الشعر من الحصول على الغذاء المناسب له، وبالتالي بيجعله عرضة أكثر للإصابة بالعوامل الخارجية.


7. الإصابة -والعياذ بالله- ببعض الأمراض زي خلل إفراز الغدد الدرقية والغدة النخامية ومرض السكري والذئبة الحمراء أو الثعلبة اللي ممكن يصاب بها الرجال والسيدات، أو ممكن إنه يكون بسبب تناول بعض الأدوية اللي بيكون لها آثار جانبية.
8. حتى الحالة النفسة اللي بتمري بيها بتأثر بشكل كبير على نمو الشعر وصحته، فإذا كنتِ مثلا مضطربة ومتوترة ممكن إنك تلاقي شعرك في هذه اللحظة أكثر عرضة للسقوط.


[b]

مشكور يا برنس علي موضوع
وبارك الله فيك
تحياتي
مداوي الجروح